Aktuelt

Joar Sande har sendt oss ei gardssoge for Sanda (gardsnummer 75 bruk 4) i Gaular, skriven av han sjølv. Soga gjev ei fin skildring av garden og folket som har budd der. Og dyra, til dømes hunden Rapp.

Mikkel Larsson Stenehjem (1843-1912) var smed i Sogndalsfjøra. Han let etter seg dagbøker som fortel om det sosiale livet hans og om arbeidslivet hans. No har Jarle Bondevik laga bok av desse nedtegningane. Boka er delt inn i kapitla «Familiemannen», «Deltakar i det sosiale livet», «Smeden», «Gardbrukaren», «Samfunnsmenneske» og «Modernisering». Kapitlet om smedarbeidet er det lengste. Elles viser notatbøkene at Mikkel var ein «mangesyslar» som arbeidde for seg sjølv og andre, men også hadde folk i arbeid.

Fylkesarkivet har motteke tre dagbøker ført i pennen av Mikkel Larsson Stenehjem. Han var smed i Sogndalsfjøra frå byrjinga av 1870-talet og fram til han døydde i 1912. Den fyrste dagboka er no digitalisert og ligg tilgjengeleg på Internett.

Blå himmel og gnistrande skiføre lokkar oss i desse dagar til uteaktivitetar. Det gjorde det òg på Leikanger for 90 år sidan. Fylkesarkivet har digitalisert ei skiavis frå 1922, med både dikt, rennreferat og rapport frå ein hyttetur.

Fylkesarkivet registrerte 71 nye privatarkiv i fjor. I mengd utgjer dei over 200 hyllemeter. Det aller største var arkivet frå Firda Canning, som aleine fyller om lag 140 hyllemeter.

Susanna Lomheim Solem har skrive bok om den norskamerikanske misjonæren Malla Moe, ei fargerik, respektert, men òg omstridd kvinne frå Hafslo. I 1992 vart ho heidra i Swaziland ved å bli portrettert på to frimerke.

Prisen går til eldsjelene bak Den norske bokbyen i Fjærland. Dette vart avgjort i hovudutvalet for kultur 29. november.

I samarbeid med Sogn og Fjordane Energi er Fylkesarkivet i gang med å samle inn og ordne det eldste arkivtilfanget frå Ytre Fjordane Kraftlag. I dette materialet ligg det spanande kjelder om krafthistoria i fylket vårt.