KAI-konferansen 2011

Tilsette frå KAI- miljøa (Kommunale arkivinstitusjonar) kringom i landet møtest ein gong i året for fagleg påfyll og utveksling av idear.  Heile kommunearkivavdelinga på Fylkesarkivet deltok på konferansen i Drammen, som var den 22. i sitt slag og sers vellukka både med omsyn til fagleg innhald, teknisk arrangement og kulturelt og sosialt program. Årets konferanse var ikkje bygt opp kring eitt samlande tema, men baud på noko for ein kvar smak. Gjennom gode plenumsforedrag og parallellsesjonar vart det sett søkelys på ulike arkivfaglege område og problemstillingar som m.a. interkommunalt samarbeid, depot og formidling, sosiale medium og Riksarkivarens rapport.

Konferansen spegla også arkivfagets internasjonale og fleirkulturelle aspekt. Gjennom synsvinkelen frå det nære til det fjerne, fekk vi innblikk i prosjektet Multikulturelle arkiv i Drammen, døme på nordisk arkivmiljø frå  Island, røynsler frå internasjonalt samarbeid og nyttige ”Fjellvettreglar” i slikt arbeid frå Byarkivet i Bergen og orientering om den nystifta organisasjonen ”Arkivarer uten grenser” frå Karianne Schmidt Vindenes, Vestfoldarkivet.

Drammen by feirar i år sitt 200- års jubileum og gjennom den kulturelle og sosiale delen av programmet vart deltakarane presenterte for byens historie og byens kulturelle mangfald gjennom lokalhistorisk foredrag, byvanding, museumsutstilling, besøk på Aass bryggeri (Noregs eldste bryggeri) og musikalske innslag.  

Vel blåst til Drammen byarkiv!