"Bygderøveri"?

Det er 100 år sidan dei reiv prestegards-huset på Leikanger, og sende materialen til Austlandet, første etappe pr. båt til Bergen og derifrå med jernbane austover. No står huset på Norsk Folkemuseum innreidd med møbler og anna utstyr frå familien Thaulow.

Eit kulturvernspørsmål kom opp i samband med flyttesaka. "Sogns Tidende" melde i februar 1911 om at prestegarden på Leikanger kunne enda opp på museet på Bygdøy. Samstundes spurde avisa om det var noka god løysing. Det var avisa "Gula Tidend" i Bergen som hadde reist spørsmålet. Kvifor skulle ein bygning som hadde kulturhistorisk verdi flyttast frå Sogn til Oslo? Burde ikkje det nyskipa "sogelaget for Sogn" ha førsteretten? Og om det no var slik at sogelaget ynskte å ta hand om bygningen, men fekk avslag, ville det ikkje då vera «bygderøveri»?

Siste nummer av "Kyrkjeblad for Leikanger" melder at 100-årsjubileet for noverande prestegard i 2012 skal markerast på fleire måtar.