110 år sidan Ingebjørg L. Ølnes vart fødd

Under gjennomgang av materialet har vi komme over mykje interessant stoff om bondekvinnene. Ei av dei som har markert seg sterkt på lands- og fylkesbasis er Ingebjørg L. Ølnes frå Sogndal som i dag ville ha vore 110 år.

Ingebjørg L. Ølnes var fødd den 28. juni 1902 og døde 14. juli 1982. Ho var ei markant kvinne i Sogn. I arkivet finn vi opplysningar som fortel at ho var den første kvinnelege medlem av Sogndal formannskap og kommunestyre, der ho sat i fleire periodar. I 1947 skipa ho Sogndal Bondekvinnelag, der ho var leiar i 28 år. Under skipinga av Sogn og Fjordane Bondekvinnelag i 1948 var ho ei drivande kraft. Ho var leiar der i ei årrekkje samstundes som ho var med å skipa fleire lokallag. På toppen av det heile var ho både styremedlem og leiar i Norges Bondekvinnelag i fleire år.