"La Norvege 1922"

Albumet dokumenterer to franske turistar på reise i Noreg sommaren 1922, meir eksakt frå 4. august til 7. september. Om vi går ut frå at bileta er sett inn i albumet i nokolunde kronologisk rekkefølgje ser det ut til at Stavanger var første stoppestaden på reisa. Deretter har turen gått nordover med båt forbi Haugesund til Bergen og så vidare til Hardanger. I albumet finn vi fleire bilete frå Ulvik og Nordheimsund, mellom anna er Hotel Brakanes og Steindalsfossen dokumenterte. Frå Hardanger har så turen gått vidare til Nordfjord. Her er bilete frå Rugsund, Måløy, Stryn, Loen, Olden og Sandane. Frå Sandane har franskmennene reist til Vadheim med bil, før dei igjen har gått om bord og reist innover Sognefjorden og Nærøyfjorden. Frå Sogn ser det ut til at dei har reist vidare med bil til Oslo via Tyin og Fagernes. I Oslo har dei som turistar flest fotografert slottet og stortinget, men dei har også vore så heldige å fange inn kong Haakon med kameralinsa. Sørlandet er siste stoppestad på turen. Turistane har vore innom både Kragerø, Kristiansand og Lillesand. Frå Lillesand er det spesielt mange bilete, fleire av dei personbilete. Kan hende har dei to franske turistane brukt siste delen av ferien sin til å vitja kjensfolk i Lillesand?

Vi har digitalisert både heile albumsidene og dei einskilde bileta, slik at du kan studere både albumet som heilskap og detaljane i dei einskilde bileta. Legg gjerne inn ein kommentar til bileta dersom du kan fortelje oss meir om stadene og personane som er avbilda.